Oyster Season

好蠔派 – Oyster Season

經過一星期地獄又折返人間的加班生活,終於可以假借賽後的賽後檢討相約師兄鬆一鬆,飲下啤酒,食下海鮮,放縱自己,剛巧大家都住元屯附近,所以我地既 target 都係元朗附近,方便大家 happy hour 完都可以有車番屋企。深明師兄係一位識飲識食既人,尤其愛食海鮮,身為師妹既我當然毫不怠慢,更加要出盡力搵間餐廳好好招待師兄, 最後選定一間係元朗都略帶名氣既食蠔西餐廳-好蠔派。

一入餐廳,其實我好自然被一大幅牆上的油畫吸引了,充滿歐陸味道,即時諗返起早兩年暑假去新天鵝堡,威尼斯既美好時光,加上適合的燈光配上 soft music,令未食呢餐飯既我暗暗中為餐廳加了不少的分數,雖然地方不大,但似乎是一個同朋友談天說地既好地方,下一步就要用餐廳的食物去判斷去印證我既諗法,因為一間成功既餐廳除左要有一個好既環境外,當然要同時講求食物既質素同店員服務既態度先值得人客 encore。下一步當然要細看menu,反正我地都係第一次去呢間餐廳,倒不如睇下有無好既廚師推介,值得一讚既係當我地呢班有選擇困難既人唔知想食咩既時候,職員都好 nice,好熱心咁問下我地有無野特別想食同係唔係特別肚餓,幫我地諗埋餐單。

Oyster Platter

Oyster from France

師兄本身熱愛食生蠔,加上餐廳本身主打新鮮海鮮刺身,生蠔。餐廳直頭用「生蠔」作店名,睇黎佢地對自己既產品好有信心,我地當然集中火力 order 海鮮,所以我地一反常態無選擇 dinner set,最後決定散叫。我地先黎 seafood platter,生蠔都會按照唔同月份,當日餐廳既來貨去決定當日既蠔。 因為價錢唔算平($468),所以我地都對佢有好大期望,事實上呢盤一上場就令我地嘩聲四起,忍唔住不停咁攞住部手機左影右影,一盤就滿足我地3個人既願望,生蠔!帶子!蝦!翡翠螺!當日我地首先試左比較淡味既生蠔,有 AROUSANAMIBIA,老實就今次我地食到既生蠔比上一次去其他餐廳食既更肥美同鮮甜,金屬味比較淡,更岩我地既口味。

我地都一致贊成 NAMIBIA 口感更 creamy,層次較高,值得我地再回頭,但區區兩種生蠔又點會可以滿足到師兄既要求,所以我地再加單,叫多兩種品種既蠔,一齊傾傾食經。經過店員既推介,同想搵出不同既層次感,最後店員幫我地發板,order 左口味較重既蠔,分別有 DIAMONDROLAND。事實上呢四種蠔各帶特色,頭兩種味道較light,相反之後落單既 DIAMOND 同 ROLAND 濃郁d,海水味重,因為有鹹味襯托住,甘甜味會比 AROUSA 同 NAMIBIA 出,呢樣野的確係帶左一個驚喜俾我地。由一開始淡味食到濃味,真係會食得出佢地既層次。如果要我真係作出一個排名,我既首選會係 NAMIBIA ,跟著係 ROLAND,DIAMOND,最後先係 AROUSA。

Assorted WinePs: 個人小貼示:如果大家好杯中物,可以配上白酒,海鮮既鮮味會更出千奇,唔好怕唔好意思,開出你地既金口咁請店員推介,美味會加倍。

食完海鮮當然要正式入主題,我地當日都有叫左一個 salad(鴨胸蘆筍沙拉),兩個主菜(紅酒牛肝菌燴牛面肉,香煎帶子配欖菜枝)share 咁食。食得出 salad 用料係新鮮既,餐廳都毫不留手咁落陳醋同橄欖油做 dressing, 生律菜既種類都多,可惜我唔太習慣做太酸既salad,廚師大哥落得太重手了,雖然作為一個開胃前菜係一個唔錯既選擇,但對我黎講呢個 salad 唔太岩我口味,另外鴨胸比較肥,有一刻我諗緊呢個鴨胸同我去燒味店食既鴨胸究竟有咩分別⋯

因為友人唔太食刺身,所以佢對呢個環節期待左好耐。我地先食左煙薰煎帶子,落 order 同店員閒聊間先知,呢個帶子係不定期推出,唔係成日都會出現係 menu 中,睇黎我地今日有食神啦~帶子既擺位,陪碟係唔錯的,老闆娘見我地對呢個菜咁有興趣,都忍唔住出黎同我地講呢個係一個中西式混合既 dish, 因為帶子用西式好常見既煙薰既做法,下面既欖菜係中菜煮法,食落朋友反而更欣賞配菜,廚房咁既煮法更令我地眼前一亮,妹仔真係會大過主人婆,真心講,帶子相較之下有少少平凡啦~

我本身係一位牛魔王,雖然要減肥,但都忍唔住叫左紅酒牛肝菌燴牛面肉,一碟大概都有3-4塊牛面肉,係抵食既,加上又配大量既配菜!無錯,呢碟既配菜依然獲得我地三人好高既評價,我地成日都好似偏離左個主題,去左討論配菜~好啦,講番牛面肉啦,其實我地三個都係第一次食牛面肉,所以對我地黎講都係一碟好特別既菜,紅酒味唔重,唔會太喧賓奪主但安守佢既位子,牛面肉真係好淋,用刀輕輕一劃,好容易將牛肉分開,入口即溶,可能係我食過最淋最嫩既牛肉,如果大家都愛好食牛的話,呢個係一個唔錯既選擇,我地都有估計要煮幾耐先會有呢個效果出現,我自己個人覺得廚房可能用了低溫慢煮既方法去烹煮,當然呢個只係我個人猜想,哈,如有錯失,歡迎大家指出,俾個機會我學下野~呢個菜完全值得大家 order。

好蠔派除了海鮮生蠔出色外,主菜的水準都不錯,有時老人家成日都講,一分錢就一分貨既道理,同時適合於飲飲食食方面,好蠔派就是一個好既例子。仲有一個值得一讚既地方,呢間餐廳員工同員工之間既關係真係唔錯,「你今日都無咩食野,全日都係食左一個包」「不如我煮d野俾你食啦」我個人比較八卦,所以都會好留意老闆同員工之間既關係,一間好既餐廳除左有好既食物質素外,員工做得開心,佢地對客既服務當然會好d, 落力d幫公司做野,我深信呢個係定律黎。我欣賞呢間餐廳既其中一個原因就係佢地既人情味。如果大家行開呢頭附近,想搵一間輕輕鬆鬆同友人食下野,得閒同店員吹下水既溫馨西餐廳,不妨俾個機會d小店,連鎖餐廳我地已經有太多了,係時候支持一下有心既餐廳,發掘一下一直都係我地身邊既小店:)

Author: Heng Heng

好蠔派 – Oyster Season

0 Comments

Leave a reply

你的電子郵件位址並不會被公開。 必要欄位標記為 *

*

CONTACT US

We're not around right now. But you can send us an email and we'll get back to you, asap.

Sending

©YLCAT.com / Yuen Long Catalog

or

Log in with your credentials

or    

Forgot your details?

or

Create Account